Астанада өтіп жатқан барлық деңгейдегі мәслихаттар депутаттарының форумында Мәжіліс депутаты Ринат Зайытов ұлттық өнер орталығы керек екенін айтты, - деп хабарлайды Dauletten.kz.
Мәдени майданда қазақ үшін оның руханияты үшін ұлтымыздың ұлы болмысынан айырылып қалмау үшін, бүгініміз тозып, ертеңіміз азып кетпеу үшін негізгі мәселе - ұлттық дәстүр мен өнер. Тәуелсіздік алғалы бері еш ескерілмей тасада қалып жатқаны ұлттың төл өнерін төрге шығаратын уақыт келді. Қорқыт атамыздың қолынан түспеген қобыз, Сүйінбай сөзімен абырой-намысымызды асқақтатқан айтыс, күй атасы Құрманғазы мен Тәттімбет, Маңғыстаудан Сыр бойына дейін жыр төккен сүлейлер мен қайқылар, әлемді әнімен мойындатқан Әмірелердің мұрасы бүгінгі күні өздеріне лайық тұғырға орналаса алмай келеді. "Ұлттық дәстүр мен өнердің ордасына айналатын оңаша шаңырақ қажет. Мәселен, Қытайдағы дәстүрлі Пекин орталығы, Италиядағы Ла-скала, Қырғыз ағайынның дәстүрлі Манас орталығы өз ұлтының төл өнері мен дәстүрін сақтап, дамытып отыр. Бізге де осындай республикалық деңгейдегі ұлтымыздың ән, күй, жыр, айтыс-термесін әлемге танытатын бір дәстүрлі ұлттық театр ауадай қажет. Ол жай ғана театр емес, қазақ ұлтының рухани байлығын баршаға паш етіп, ұрпақ тәрбиесіне оң әсерін тигізетін орталық болатынына еш күмәнім жоқ, - деді Ринат Зайытов.
