Жаңалықтар

Хасан Қасымбаев ісінде тағы бір жәбірленуші анықталды

13.03.2025

1 мин

0

1024

Хасан Қасымбаевқа қатысты іс бойынша тағы бір жәбірленуші пайда болды. Бұл туралы бірінші жәбірленуші Арман Әлімовтің адвокаты мәлімдеді, - деп хабарлайды Dauletten.kz.

Бұған дейін Қасымбаевқа адам ұрлау, денсаулыққа қасақана ауыр зиян келтіру және бопсалау фактілері бойынша тергеу басталған еді.

- Ұрлау мен денсаулыққа ауыр зиян келтіру Арман Әлімовке қатысты, ал бопсалау басқа жәбірленушіге байланысты, — деді адвокат Әлішер Әлішев. Оның айтуынша, қазіргі таңда бұл іс бойынша екі жәбірленуші бар.

Сондай-ақ, адвокат Хасан Қасымбаевтың қазір уақытша ұстау изоляторында отырғанын растады. Алайда оған ұйымдасқан қылмыстық топ (ҰҚТ) құру және оған басшылық ету бойынша айып тағылмаған.

- Тергеу аяқталуға жақын, іс материалдарымен танысу процесін күтіп отырмыз. Тергеу нәтижесін күтеміз, — деді Әлішев.

Айта кетейік, Қасымбаевтың есімі Талғардағы Шерзат Болаттың өліміне қатысты іс аясында жиі атала бастады. Бұған дейін, 2021 жылы, ол ережесіз жекпе-жек жаттықтырушысын ұрлап, соққыға жықты деген күдікке ілінген болатын.

Осыдан үш жыл бұрынғы қылмыс видеоға түсіп қалған. Жазбада жәбірленуші ретінде ережесіз жекпе-жек жаттықтырушысы Арман Әлімов көрсетілген. Жәбірленушінің туыстарының айтуынша, оны алдымен “Виктория” шағын маркеттің жанында соққыға жығып, кейін ес-түссіз күйде Кеңдала ауылындағы канал маңынан тапқан. Сол кезде ол ауыр халде ауруханаға жеткізілген.

Хасан Қасымбаев 2024 жылғы 2 қарашада ұсталып, кейін екі айға қамауға алынды.