|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Жүкті немесе бала емізетін әйелдерге ораза ұстауға бола ма? Бұл сұраққа Қазақстан мұсылмандары діни басқармасы (ҚМДБ) өкілдері жауап берді, - деп хабарлайды Dauletten.kz.
ҚМДБ мәліметінше, егер жүкті немесе емізулі әйел ораза ұстау өзінің немесе баласының денсаулығына зиян тигізуі мүмкін деп қорықса, онда оған ораза тұтпауға рұқсат етіледі. Кейін ол қазасын өтейді, бірақ кәффарат төлеу міндеттелмейді және підия беру де қажет емес. Себебі жүкті немесе бала емізетін әйелдің жағдайы қарт адамның жағдайына ұқсамайды.
Әнас ибн Мәліктің (Алла оған разы болсын) риуаятында:
- Алла Елшісі (оған Алланың салауаты мен сәлемі болсын) өзінің денсаулығы үшін қауіптенетін жүкті әйелге және сәбиіне зиян тиюінен қорыққан емізуші әйелге оразасын ашуға рұқсат етті, – делінген.
Егер бала емізетін әйел баласын қосымша тағамдармен немесе арнайы қоспалармен тамақтандыру мүмкіндігіне ие болса, онда оразасын жалғастыра алады. Ал егер мұндай мүмкіндігі болмаса немесе сәби қосымша тағамдарды қабылдамаса, онда анасы өзінің немесе баласының денсаулығына қауіп төнбеуі үшін оразасын аша алады.
Сонымен қатар, ҚМДБ мәлімдемесінде дәрігер емізетін анаға қажетті дәрумендер қабылдауды ұсынса, онда оған ораза ұстамауға рұқсат етілетіні айтылған.
- Денсаулыққа немесе сәби үшін зиян бар-жоғын нақты анықтау үшін білікті дәрігерге жүгіну қажет. Бұл – барлық ислам ғұламаларының қолдаған шешімі. Ал қазасын өтеу кезінде оразаны күнделікті қатарынан немесе үзіп-үзіп ұстауға рұқсат етіледі, – делінген ҚМДБ жауабында.
