|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Солтүстік Қазақстан облысында 11 жастағы қызының денсаулығына ауыр зиян келтіргені үшін көпбалалы анаға сот үкімі шықты, - деп хабарлайды Dauletten.kz.
40 жастағы Уәлиханов ауданының тұрғынына қатысты істі кәмелетке толмағандар ісі жөніндегі мамандандырылған ауданаралық сот жабық режимде қарады.
Сотта анықталғандай, әйел үй тапсырмасын тексеру барысында қызының мектеп дәптерін ұқыпсыз жүргізгенін байқап, оны асүй пышағымен сол және оң жамбасынан жарақаттаған.
Айыптауды қолдаған прокурор сотталушыға алты жылға бас бостандығынан айыру жазасын тағайындауды сұрады. Қыздың анасы өз кінәсін толық мойындап, өкінетінін айтып, айыптауға қарсылық білдірмеді.
Қорғау тарапы, сондай-ақ жәбірленушінің өкілі мен қыздың өзі анасына бас бостандығынан айырмайтын жаза тағайындауды сұрады.
Соттың түсіндіруінше, ҚР ҚК 106-бабы 2-бөлігінің 3 және 11-тармақтарына сәйкес, бұл қылмыс үшін 6 жылдан 10 жылға дейін бас бостандығынан айыру жазасы, мүлікті тәркілеумен немесе тәркілеусіз қарастырылған.
Сотталушының шын жүректен өкінуі жеңілдететін жағдай ретінде танылды, ал ауырлататын мән-жайлар анықталған жоқ. Әйелдің алты кәмелетке толмаған баласының болуы жеңілдететін жағдай деп есептелмеді, себебі қылмыс оның өз баласына қарсы жасалған.
- Жазаны тағайындау кезінде сот қылмыстың сипаты мен қоғамдық қауіптілік дәрежесін, оның жасалу жағдайлары мен ауырлығын ескерді. Бұл сотталушының бірінші рет қылмыс жасауы және оның жүктілігі назарға алынып, ең төменгі жаза — алты жыл бас бостандығынан айыру тағайындалды. Шартты жаза тағайындауға негіздер жоқ, — делінген судья Әсемгүл Тоқтарбаеваның үкімінде.
Сотталған әйел жазасын орташа қауіпсіздік деңгейіндегі қылмыстық-атқару жүйесі мекемесінде өтейтін болды. Сотқа келуге міндеттелген ана сот залында қамауға алынды.
Үкім заңды күшіне енген жоқ.
