|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Солтүстік Қазақстан облысы М. Жұмабаев ауданының полиция бөліміне ауыл тұрғыны жылқысының ұрланғаны туралы арызбен жүгінген. Белгісіз адам мал қорадан жылқымен бірге ер-тоқымын, жүгенін және үй иесінің пимасын алып кеткен, - деп хабарлайды Dauletten.kz.
Жедел-іздестіру шаралары барысында полиция қызметкерлері мен жылқының иесі қар үстіндегі іздерді 30 шақырымдай қудалады. Іздер Булаево – Молодогвардейское автожолына жақын орналасқан орманға алып келген. Қалың бұталардың арасында қазылған және үсті жабылған, ішінде қолдан жасалған пеші бар жеркепе анықталды. Сол жерде ауданның 48 жастағы тұрғыны жылқы етін бөлшектеп жатқан жерінде қолға түсті.
Полиция қызметкерлерінің болжамы бойынша күдікті осы қылмысты жасаған.
– Аталған азамат бұған дейін пәтер ұрлығы үшін сотталып, үш жыл алты айға бас бостандығы шектелген. Алайда пробациялық бақылаудан қашып, бой тасалаған. Ол бұрын жылқының иесінде жұмыс істеген, қораның орналасқан жерін және қай жылқылардың үйретілгенін жақсы білген. Ұрланған пима оның адамдардан жасырынғанын көрсетті, – деп мәлімдеді аудандық полиция бөлімінің бастығы Асан Мейрамов.
Қазіргі уақытта күдікті қамауға алынды. Ол мал және пәтер ұрлығына қатысы бар деген күдікке ілінді. Тергеу барысында пәтер ұрлығының сот үкімі шыққан күні жасырынған кезінде жасалғаны анықталды. Сонымен қатар, күдікті пробациялық бақылау ережелерін бұзғаны үшін де жауапқа тартылады.
Жыл басынан бері Солтүстік Қазақстан облысында мал ұрлығы бойынша бес факт тіркеліп, оның үшеуі ашылды. Полиция қызметкерлері мал ұрлығының алдын алу мақсатында тұрақты жұмыс жүргізеді. Қараша айында өткен "Мал ұрысы" жедел-профилактикалық шарасы барысында бұрын жасалған бір қылмыс ашылып, ет тасымалдау мен сатуға қатысты ветеринариялық бақылаудың 37 бұзушылығы анықталды.
