Жаңалықтар

Қырғызстанда Ақан Сатаевтың “Рэкетир: Новые времена” фильмі прокаттан алынды

21.02.2025

1 мин

0

135

Қырғызстанда Ақан Сатаевтың “Рэкетир: Новые времена” фильмі прокаттан алынды. Бұл туралы ақпарат қырғызстандық “Синематика” кинотеатрлар желісінің Instagram парақшасында жарияланды, - деп хабарлайды Dauletten.kz.

- Көрермендерге ақшасын қайтарып алу үшін кинотеатр әкімшілігіне жүгінуді сұраймыз, – делінген хабарламада.

Кейінірек компания жергілікті Kaktus.media басылымына фильмнің прокат куәлігі қайтарып алынғандықтан көрсетілмейтінін мәлімдеді. Бұл шешімді мемлекеттік “Кыргыз тасмасы” концерні қабылдаған.

- Мұның себебін “Кыргыз тасмасынан” сұрау керек. Біз тек олардың талабын орындап отырмыз. Егер фильмді көрсетсек, айыппұл төлейміз. Алдағы күндері сатып алынған билеттердің ақшасын қайтарумен айналысамыз. Клиенттер өте көп. Иә, фильм бүгін (20 ақпан – ред.) прокатқа шығуы керек еді, бірақ біз сейсенбі күні алдын ала сатылымды бастадық. Билеттерді бір апта бұрын сатып алуға мүмкіндік болды, әсіресе демалыс күндері көп адам билет алды, – деп мәлімдеді “Синематика” өкілдері.

Сонымен қатар, Kaktus.media-ның жазуынша, бұған дейін депутат Бактыбек Марипов Жогорку Кенештің құқықтық тәртіп комитетінде Қырғызстанда бандиттік идеологияны насихаттайтын фильмдерді көрсетуге тыйым салуды ұсынған. Ол “Черный двор”, “Слово пацана”, “Бригада” және осыған ұқсас фильмдердің жасөспірімдердің психоэмоционалдық жағдайына кері әсер ететінін атап өткен.

Ал фильмнің Instagram-дағы ресми парақшасында “Рэкетир: Новые времена” Қазақстанда шыққан алғашқы төрт күнде 600 миллион теңгеге жуық қаражат жинап, қазақстандық прокатта рекорд орнатқаны жазылған. Сондай-ақ, фильмнің алдын ала көрсетілімі оған түскен актерлердің қатысуымен Мәскеу, Ташкент және Бішкек қалаларында өткен.