|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Қазақстанда жеке медициналық (санитарлық) кітапшаның электрондық нұсқасы енгізілді. Енді азаматтар медициналық тексеру нәтижелері мен санитарлық кітапшаға қатысты ақпаратты E-Densaulyk сервисі арқылы eGov mobile қосымшасынан қолжетімді түрде ала алады. Бұл жаңашылдық медициналық тексеруден өту уақытын қысқартып, терапевтке қайта бару қажеттілігін жояды, - деп хабарлайды Dauletten.kz.
Санитарлық кітапша дайын болғанда, азаматтарға 1414 нөмірінен SMS-хабарлама жіберіледі. Ал жұмыс берушілер қызметкерлерінің медициналық кітапшаларының өзектілігін hr.enbek.kz порталы арқылы тегін тексере алады. Бұл санитарлық талаптардың сақталуын бақылауды жеңілдетіп, ықтимал қателердің алдын алуға мүмкіндік береді.
Денсаулық сақтау министрлігінің мәліметінше, электронды жүйе 15 түрлі сала қызметкерлерін қамтиды. Олардың қатарында қоғамдық тамақтану, дәріхана, санаторий қызметкерлері, сондай-ақ қызмет көрсету және медицина саласының мамандары бар. Бұл санаттағы азаматтар жылына бір рет немесе алты ай сайын медициналық тексеруден өтуі тиіс.
- Жеке медициналық кітапшалардың электронды форматқа көшуі олардың рәсімделу және тексерілу процесін азаматтар мен жұмыс берушілер үшін барынша жеңіл әрі жылдам етті, – деп мәлімдеді ведомство өкілдері.
Бұған дейін Денсаулық сақтау министрлігі медициналық анықтамалардың, оның ішінде медициналық кітапшалар мен еңбекке жарамсыздық парақтарының сегіз түрін қағаздан электронды форматқа ауыстыру жоспарланып отырғанын хабарлаған болатын.
