Жаңалықтар

Қазақстанда қандай салалар ҚҚС-тан босатылуы мүмкін?

28.02.2025

1 мин

0

478

Ұлттық экономика бірінші вице-министрі Азамат Әмрин елімізде қандай салалар қосылған құн салығынан (ҚҚС) босатылуы мүмкін екенін мәлімдеді, - деп хабарлайды Dauletten.kz.

Бүгін Мәжілісте өткен дөңгелек үстел барысында Қазақстанда жоспарланған салық реформасының негізгі аспектілері талқыланды.

- ҚҚС бойынша сараланған мөлшерлеме енгізуді ұсынамыз. Базалық мөлшерлеме 16 пайыз деңгейінде белгіленеді. Екінші нұсқа ретінде агроөнеркәсіп кешенін ҚҚС-тан толық босату қарастырылуда. Бұл жағдайда ерікті түрде ҚҚС төлеу құқығы сақталады. Сонымен қатар, 10 пайыздық аралық мөлшерлеме де ұсынылып отыр. Қазіргі таңда Парламент қарауындағы құжатта бұл мөлшерлеме денсаулық сақтау саласына қолдану жоспарланған, – деді Әмрин.

Оның айтуынша, бизнес өкілдерімен кездесулер мен түрлі алаңдардағы талқылаулар барысында көптеген ұсыныстар түскен. Олардың ішінде азық-түлік өнімдері мен басқа да тауар санаттарына ҚҚС мөлшерін төмендету мәселесі де көтерілген.

Салық кодексінің жаңа жобасында мынадай өзгерістер қарастырылған:

• Бұқаралық ақпарат құралдары мен агроөнеркәсіп кешенін ҚҚС-тан босату, ал жалпы мөлшерлемені 12 пайыздан 16 пайызға дейін көтеру. Сонымен қатар, фармацевтика, медициналық қызметтер және әлеуметтік маңызы бар азық-түлік тауарларына ҚҚС мөлшерлемесін 10 пайыз деңгейінде белгілеу.
• ҚҚС төлеуші ретінде тіркелу үшін шекті мөлшерді 20 000-нан 3 800 АЕК-ке дейін төмендету (2025 жылы бұл көрсеткіш 14 941 600 теңгені құрайды).

“Қазіргі уақытта бұл мәселелер жан-жақты талқыланып жатыр. Мәжілістегі жұмыс тобы осы ұсыныстардың барлығын егжей-тегжейлі қарайды”, – деп түйіндеді вице-министр.