Жаңалықтар

Қазақстан Сауда министрлігі АҚШ-тың жаңа баж салығын енгізуіне қатысты мәлімдеме жасады

03.04.2025

1 мин

0

61

Сурет: BBC

Қазақстанның Сауда және интеграция министрлігі АҚШ-тың бірқатар тауарға жаңа кедендік баж салығын енгізуіне байланысты мәлімдеме жасады, - деп хабарлайды Dauletten.kz.

Министрліктің хабарлауынша, алдын ала жүргізілген талдау нәтижесінде Қазақстаннан АҚШ-қа экспортталатын тауарлардың басым бөлігіне қосымша тарифтердің әсер етпейтіні анықталған. Себебі бұл өнімдер АҚШ әкімшілігінің нормативтік актілерінде көрсетілген ерекшеліктер тізіміне енген.

Ведомство Қазақстан Ұлттық статистика бюросының деректерін келтірді. 2024 жылы Қазақстан мен АҚШ арасындағы тауар айналымы 4,2 млрд АҚШ долларын құрап, өткен жылмен салыстырғанда 4%-ға өсті (2023 жылы – 4,1 млрд АҚШ доллары). Қазақстанның АҚШ-қа экспорты 30,6%-ға артып, 2 млрд АҚШ долларына жетті, ал АҚШ-тан Қазақстанға импорт 2,2 млрд АҚШ долларын құрады.

Қазақстаннан АҚШ-қа экспортталатын негізгі тауарлар – шикі мұнай, уран, күміс, ферросплавтар және басқа да өнімдер. Бұл тауарлардың 92%-ы АҚШ президентінің “Тауарлар саудасындағы маңызды және тұрақты тапшылықты жою мақсатында өзара тарифтер арқылы импортты реттеу туралы” Жарлығы бойынша ерекшеліктер тізіміне енгізілген.

Министрліктің мәліметінше, қосымша баж салығы тек белгілі бір тауар топтарына қатысты болады. Бұл санаттағы тауарлардың 2024 жылғы экспорт көлемі 95,2 млн АҚШ долларын құраған. Олардың ішінде фосфор (15,9 млн АҚШ доллары), ферросилиций (12,7 млн АҚШ доллары), линзалар (4,1 млн АҚШ доллары), бидай клейковинасы (4 млн АҚШ доллары) және аммоний нитраты (2,4 млн АҚШ доллары) бар.

Жалпы алғанда, қабылданған тарифтік шаралар Қазақстанның АҚШ-қа экспортын тек 4,8%-ға ғана қамтиды. Осыған байланысты үкімет АҚШ-пен қосымша баждарды қолданбау мүмкіндігін талқылау мақсатында консультациялар жүргізуді жоспарлап отыр.

Министрлік Қазақстанның 10 жылдан бері Дүниежүзілік сауда ұйымының (ДСҰ) мүшесі екенін және сыртқы сауда саясатын жүргізуде ұйымның қағидаттарын қатаң ұстанатынын атап өтті.

- АҚШ-пен екіжақты ынтымақтастық аясында Қазақстан халықаралық міндеттемелерге сәйкес саудада теңдік пен кемсітпеушілікті қамтамасыз етеді, – деп қорытындылады ведомство.