|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Қарағанды облысында 150 елді мекенге тасқын судан қауіп төніп тұр. Осыған байланысты өңірде дайындық шаралары күшейтілді. Су басу қаупі жоғары 6 бағытта күштік құрылымдар мен техника жасақталған, - деп хабарлайды Dauletten.kz.
Ал Қарағанды қаласындағы жағдай қандай? Жыл сайын су басатын көшелердің мәселесі қалай шешілмек?
Руслан Нұрланұлы, тілші:
– Бұрын қаладағы оңтүстік-шығыс аумақтағы бірнеше көшені дала суы басатын. Себебі коллекторлар келген суды өткізіп үлгермей, жертөлелерге дейін толатын. Осы мәселені шешу үшін былтырдан бері қала сыртында арнайы канал қазылуда. Бұл жұмыс 10 наурызға дейін аяқталуы тиіс. Су басу қаупін азайту мақсатында биыл жаңа арық іске қосылады. Оның тереңдігі – 5 метрден асады, ал ұзындығы – 2 шақырым. Су осы арық арқылы ағып, Жартас каналына құйылады.
Григорий Ботнарь, Қалалық ТҮКШ, жолаушылар көлігі және автомобиль жолдары бөлімінің басшысының орынбасары:
– Бұл арықтың тиімділігін көктемгі су тасқыны кезінде бағалаймыз. Қазу жұмыстары басталмас бұрын гидрологиялық зерттеу жүргізілді. Жалпы, бұл жүйе арқылы 95 мың текше метр суды қала сыртына бағыттаймыз. Нәтижесінде оңтүстік-шығыс ауданындағы коллекторларға түсетін су көлемі азайып, жылдағыдай көшелерді су баспайды.
Кеншілер қаласындағы жеке үйлер орналасқан төменгі аумақтарда да жыл сайын су жиналады. Қазіргі таңда көшелерден қар шығару қарқынды жүріп жатыр, сондай-ақ 15 мың қап құм дайындалған. Бұдан бөлек, Федоров су қоймасы маңындағы саяжайларға жақын орналасқан Соқыр өзенінің арнасы қамыс пен шыбықтан тазартылуда. Жергілікті билік өкілдерінің айтуынша, мұндай жұмыстар соңғы рет 2018 жылы жүргізілген.
Ерік Ахметов, Қарағанды қаласы Қазыбек би ауданы әкімдігінің бөлім басшысы:
– Көктемгі су тасқыны кезінде судың бөгетсіз ағуын қамтамасыз ету үшін арна тазарту жұмыстары қолға алынды. Бұл үш саяжай қауымдастығын су басудан қорғауға бағытталған.
Өңірдегі қар қоры қалың, ал жердегі тоң қалыңдығы 30 сантиметрге жеткен. Егер күн күрт жылынса, тасқын қаупі артады.
Думан Далешов, облыстық ТЖД басшысының орынбасары:
– Биылғы жылы су тасқынын алдын алу үшін күштік құрылымдар мен техникалар 6 бағыт бойынша жасақталды. Өткен жылғы тәжірибеге сүйене отырып, қай елді мекендерге су жайылу қаупі жоғары екенін анықтап, тиісті шараларды қолға алдық. Әдетте, су тасу Қарқаралы ауданынан басталады, сондықтан негізгі күшті сол жаққа бағыттадық.
Қазіргі уақытта Самарқанд, Шерубай-Нұра, Ынтымақ және Ботақара су қоймалары жіті бақылауда. Сонымен қатар, көпірлер мен жол бойындағы су өткізу құбырлары қардан тазартылуда. Төтенше жағдай қызметінің өкілдері "Қазгидромет" ұсынатын наурыз айындағы ауа райы болжамына сәйкес әрекет ететінін айтты. Өзендерде мұз жару жұмыстары да осы мәліметтерге сүйене отырып жүргізілмек.
