|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Мьянмада болған жойқын жер сілкінісінен қаза тапқандар саны өсіп жатыр. Елдің әскери билігі төтенше жағдайдың салдарын жою үшін уақытша атысты тоқтату туралы мәлімдеді, - деп хабарлайды Dauletten.kz.
DW басылымы Мьянма әскери хунтасының деректеріне сілтеме жасап, 3 сәуірдегі жағдай бойынша жер сілкінісінен қаза тапқандар саны 3085-ке жетіп, 4715-тен астам адамның жарақат алғанын хабарлады.
1 сәуірден бастап елде бір аптаға қаралы күн жарияланды.
Төрт жылдан бері азаматтық соғыс жүріп жатқан елдің әскери үкіметі қарулы топтарға қарсы уақытша атысты тоқтататынын мәлімдеді. Барлық күш-жігер табиғи апаттың салдарын жоюға бағытталған.
- Зардап шеккендерге қолдау көрсету және құтқару-қалпына келтіру жұмыстарын тиімді жүргізу мақсатында атыс 22 сәуірге дейін тоқтатылады, – деп хабарлады Мьянманың мемлекеттік телеарнасы.
2021 жылғы 1 ақпандағы әскери төңкеріс нәтижесінде биліктен шеттетілген “Ұлттық бірлік үкіметін” қолдайтын көтерілісшілер де бір айға атысты тоқтату туралы шешім қабылдады.
Ал БҰҰ табиғи апаттан зардап шеккен аймақтарда су тапшылығы мен жұқпалы аурулардың көбейгенін мәлімдеді. Гуманитарлық ұйымдар елге көмек жеткізуді жеңілдету үшін қақтығысушы тараптарды атысты тоқтатуға шақырды.
- Әскери төңкеріс пен одан кейінгі қақтығыстар денсаулық сақтау инфрақұрылымын әлсіретіп, Мьянманы табиғи апаттарға дайынсыз күйде қалдырды. Жолдар мен көпірлер де елеулі зақымданған, – делінген мақалада.
