Жаңалықтар

Миллиардтаған қаражат тиімсіз жұмсалған: цифрлық салаға мемлекеттік аудит жүргізілді

06.02.2025

1 мин

0

220

Сурет: gov.kz

Цифрлық даму саясатының тиімділігіне қатысты мемлекеттік аудит аяқталды. Оның қорытындылары Әлихан Смайыловтың төрағалығымен өткен Жоғары аудиторлық палата отырысында қаралды, – деп хабарлайды Dauletten.kz.

Аудит материалдарына сәйкес, 2016-2017 жылдары “Инновациялық технологиялар паркі” АКҚ аясында 5 технологиялық даму орталығы мен 1 венчурлік қор құру үшін бюджеттен 4,9 миллиард теңге бөлінген. Алайда үш орталықтың қызметі тиімсіз әрі нәтижесіз болып шықса, екі компанияның даму стратегиясы жоқ. Осылайша, 3 миллиард теңге мақсатсыз жұмсалған.

Сонымен қатар “Инновациялық технологиялар паркі” АКҚ арқылы бюджет есебінен 987 миллион теңгеден астам қаражат бөлінген 95 стартаптың тиімділігі мен табыстылығы дәлелденбеген. 2018-2020 жылдары қаржыландырылған 32 ұйымның 18-і мәжбүрлі түрде жабылып, қалғандары қызметін тоқтатқан. Бұдан бөлек, 21 компания нөлдік салық есептілігімен жұмыс істеп тұр, бұл олардың белсенділігінің жоқтығын көрсетеді.

2015-2024 жылдар аралығында “Инновациялық технологиялар паркі” АКҚ бюджет қаражатынан бөлек, жер қойнауын пайдаланушылардан ғылыми-зерттеу және тәжірибелік-конструкторлық жұмыстарды (ҒЗТКЖ) қаржыландыру үшін 41 миллиард теңге алған. Алайда мекеменің сараптамалық комиссиясы бұл қаражаттың тиімді жұмсалуына жауапты емес, бұл шешімдердің ашықтығы мен бірізділігіне күмән туғызады. Нәтижесінде 14,8 миллиард теңге бөлінген 179 жоба негізінен бизнестің ағымдағы қажеттіліктерін шешуге бағытталып, ғылым мен жаңа технологияларды дамытуға ықпал етпеген.

Аудит қорытындысы бойынша 1,1 миллиард теңгенің қаржылық бұзушылықтары анықталған. Бюджет қаражаты мен активтерін тиімсіз жоспарлау көлемі 2,2 миллиард теңгені құраса, тиімсіз пайдаланылған қаражат 46,5 миллиард теңгеге жеткен. Сондай-ақ 45 жүйелік және 143 процедуралық кемшілік тіркелген.