Жаңалықтар

Макрон Еуропа елдерінің басшыларын шұғыл жинады: кездесуде не талқыланды?

18.02.2025

1 мин

0

438

Сурет: depositphotos

Франция президенті Эммануэль Макрон Еуропа елдерінің басшылары қатысқан саммиттен кейін АҚШ және Украина президенттерімен сөйлескенін мәлімдеді, - деп хабарлайды Dauletten.kz.

17 ақпанда Парижде Еуропаның бірнеше елінің және институттарының жетекшілері, сондай-ақ НАТО бас хатшысы бас қосты. Кездесу барысында Ресейдің Украинаға қарсы соғысы және Еуропаның Украинаға қауіпсіздік кепілдіктерін ұсынуын тоқтататын бейбіт келісімге қатысуы талқыланды. Бұған дейін АҚШ ЕО елдерінен әрқайсысының бұл келіссөзге қосатын үлесі туралы сұрау салған еді.

Париждегі жиынды Франция президенті Эммануэль Макрон ұйымдастырды. Дональд Трамп әкімшілігінің соңғы мәлімдемелері мен әрекеттері Еуропа елдерінің алаңдаушылығын күшейтті. Еуропа көшбасшыларын АҚШ-тың жаңа әкімшілігі Еуропаның мүдделерін ескере ме, жоқ па деген сұрақ толғандырып отыр. Кездесуге Франция, Германия, Италия, Испания, Ұлыбритания, Польша, Дания және Нидерланды басшылары, сондай-ақ Еурокомиссия мен Еуро кеңесінің жетекшілері және НАТО бас хатшысы Марк Рютте қатысты. Жиын басталмас бұрын Макрон АҚШ президенті Дональд Трамппен телефон арқылы сөйлескенімен, әңгіме мазмұны жарияланған жоқ.

Франция президентінің айтуынша, Еуропа өз қауіпсіздігі мен қорғанысына көбірек қаржы бөлуі қажет.

— Бірқатар еуропалық көшбасшылармен кездескеннен кейін мен АҚШ президенті Дональд Трамппен, содан соң Украина президенті Владимир Зеленскиймен сөйлестім. Біздің басты мақсатымыз — Украинада тұрақты әрі ұзақ мерзімді бейбітшілік орнату. Ол үшін Ресей агрессиясын тоқтатуы тиіс. Сондай-ақ, Украинаға мықты және сенімді қауіпсіздік кепілдіктері берілуі қажет. Әйтпесе, бұл атысты тоқтату Минск келісімдерінің тағдырын қайталайды деген қауіп бар, — деді Макрон.

Сонымен қатар, ол Еуропа елдері өздерінің егемендік, қауіпсіздік және бәсекеге қабілеттілік бағдарламаларын жүзеге асыруды жеделдетуге ниетті екенін жеткізді.