Жаңалықтар

"Халық денсаулығы және денсаулық сақтау жүйесі туралы" кодекстегі шамадан тыс реттеу алынып тасталады

25.12.2024

1 мин

0

167

Сурет: ktk.kz

Мәжіліс бірінші оқылымда денсаулық сақтау саласындағы артық заңнамалық реттеуді азайтуға бағытталған заң жобасын мақұлдады. Бұл түзетулер Мемлекет басшысының "Мемлекеттік аппараттың қызметін бюрократиядан арылту жөніндегі шаралар туралы" Жарлығын іске асыру аясында дайындалған, - деп хабарлайды Dauletten.kz.

Бюрократияны қысқарту мақсатында денсаулық сақтау саласындағы уәкілетті органның құзыреттерін реттейтін кейбір нормативтік құқықтық актілер заңға тәуелді актілер санатына ауыстырылады.

Атап айтқанда, "Халық денсаулығы және денсаулық сақтау жүйесі туралы" кодекс деңгейінде уәкілетті органның мынадай құзыреттері алынып тасталады:

• денсаулық сақтау саласындағы нұсқаулықтарды, алгоритмдерді және ережелерді әзірлеу мен бекіту;
• денсаулық сақтау саласындағы мамандықтардың, медицина қызметкерлерінің лауазымдық номенклатурасы мен біліктілік сипаттамаларын әзірлеу және бекіту;
• денсаулық сақтау саласындағы көрсеткіштерді қалыптастыру әдістерін әзірлеу және бекіту және т.б.

Сонымен қатар, міндетті әлеуметтік медициналық сақтандыру туралы заңға да бірқатар түзетулер енгізіледі. Ұсынылған заң жобасында құқықтық нормалардың сапасын арттыруға бағытталған редакциялық өзгерістер де қарастырылған.