|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Қызылорда ауруханасында бір жарым жасар қыз бала қайтыс болды. Ата-анасының айтуынша, дәрігерлер рентгеннен бөгде затты байқамай, қызды бронхиттен емдеген. Ал бұл уақытта оның жағдайы күрт нашарлаған, - деп хабарлайды Dauletten.kz.
Бала екі аптадан астам уақыт облыстық инфекциялық ауруханада болды, бірақ дәрігерлер оның жағдайының нашарлау себебін анықтай алмады. Анасының айтуынша, алғашқы рентгенде маман бөгде затты байқамаған, сондықтан осы уақыт бойы қызға бронхитке қарсы ем тағайындалған. Амина ішіп-жей алмай, қатты қиналып көз жұмған.
Амина есімді сәбидің анасы Оксана Шильеваның айтуынша, 18 қаңтар күні таңертең қызы ботқа жегеннен кейін құса бастаған. Оксана бастапқыда баласы жаңғаққа тұншығып қалған шығар деп ойлап, аса мән бермеген.
- Біршама уақыт өткен соң, құсу тағы 5-7 рет қайталанды. Жедел жәрдем шақырдық. Дәрігерлер ауруханаға жатқызуды ұсынды, бірақ біз бас тарттық, өзіміз жеңеміз деп ойладық. Бізге дәрі-дәрмектер жазып берді, содан кейін Амина өзін жақсы сезініп, ойнай бастады. Бірақ түнде дене қызуы көтерілді, мен оған “Эфералган” шамын қойдым. Келесі күні қызуы қайта-қайта көтеріліп, кешке қарай мүлде әлсіреп қалды. Тағы да жедел жәрдем шақырдық, – деп еске алады анасы.
Облыстық инфекциялық ауруханада балаға антибиотиктер салынып, система қойылды. 23 қаңтарда Оксана мен қызын қанағаттанарлық жағдайда үйіне шығарды. Бірақ келесі күні қызды қайта ауруханаға жатқызды – ол сырылдап, жөтеліп, тыныс алғанда қырыл пайда болып, дене қызуы 38 градусқа жетті. Демалыс күндері оның жағдайы күрт нашарлады.
- Ол қатты жөтеліп, сырыл тоқтамады. Амина тамақ ішпеді, тіпті су да ішкісі келмеді. Мен оған аздап су беруге тырысқанда, ол қатты айқайлады. Дәрігерлер рентген жасады, бірақ түсірілім жоғалып кетті. Оның нәтижесі бойынша бізге бронхитке қарсы ем тағайындалды. 28 қаңтарда сатурация 82-ге дейін төмендеді. Рентгенолог бізде пневмония бар деп ойлады, өйткені ол балаларда ересектерге қарағанда тез дамиды. Бірақ мен реанимациядан бас тарттым. Алайда келесі күні қызымды бәрібір сонда ауыстырды, – дейді анасы.
Әйел түскі астан кейін қызын көруге келгенде, оның толықтай аппараттарға қосылып жатқанын көрген. Дәрігерлер асқазанды тазалап, система қойып, зонд арқылы тамақтандырып жатқанын айтқан. 31 қаңтарда Амина көзін ашпай жатты. Сол күні кешке ғана дәрігерлер жағдайдың нақты себебін анықтағандарын хабарлады. Қайта жасалған рентген көмей аймағында бөгде зат барын көрсетті. Қызды шұғыл түрде көпсалалы облыстық балалар ауруханасына ауыстырып, балалар хирургі шақырылды.
- Операция әдетте 10-15 минутқа созылады, бірақ бұл жолы ұзаққа созылды. Кейін белгілі болғандай, бұл тиын емес, батырмалы батарейка екен. Дәрігер маған оның көмейде екі апта бойы тұрғанын, осы уақыт ішінде тіндерді бүлдіріп, өңеш пен кеңірдектің арасында тесік пайда болғанын түсіндірді. Бала жегеннің бәрі бірден өкпесіне түскен. Жедел ота қажет болды. Кейінірек маған оны Алматыда телемедицина арқылы жасайтынын айтты, – дейді анасы ауыр күрсініп.
Келесі күні Оксананы жансақтау бөліміне шақырды. Дәрігерлер баланың тым әлсіз екенін, сондықтан оны Алматыға жіберу мүмкін емес екенін хабарлады. Ота осында жасалуы тиіс болды, бірақ ешқандай кепілдік берілмеді. Дәрігерлер қызды құтқара алмады.
- Рентгеннен оның сол жақ өкпесінің жоқ екенін, ал оң жақ өкпесінің тек сұлбасы қалғанын көрсетті. Сатурация 70-ке дейін төмендеді. Ол жасанды тыныс алу аппаратына қосылды және тек жүрегі соғып тұрғандықтан ғана өмір сүріп тұрды. Бізге онымен қоштасуға рұқсат берді, өйткені кешке дейін өмір сүрмеуі мүмкін еді. Екі сағаттан кейін бізге оның қайтыс болғанын хабарлады, – дейді Аминаның анасы.
Анасы әділдікке қол жеткізіп, қызының өліміне кімнің кінәлі екенін анықтауға ниетті. Ол дәрігерлердің неге уақытында қауіпті бөгде затты анықтап, баланы құтқара алмағанын білгісі келеді. Әйел Қызылорда полиция басқармасына шағым түсірді. Жақын арада құжаттар Денсаулық сақтау министрлігі мен Бас прокуратураға жіберіледі.
- Біз кінәлілердің жауапкершілікке тартылып, лайықты жаза алуын талап етеміз, – деді жәбірленуші тараптың өкілі, заңгер Айгүл Шегірова.
- Қазіргі уақытта болған жағдайдың барлық мән-жайын анықтау үшін кешенді тергеу шаралары жүргізілуде. Іс департамент басшылығының бақылауында, – деп мәлімдеді ведомствоның баспасөз қызметі.
