|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
"ҚазАвтоЖол" ұлттық компаниясы Атырау – РФ шекарасы (Астрахан бағыты) республикалық маңызы бар автомобиль жолын реконструкциялау бойынша негізгі жұмыстардың аяқталғанын хабарлады, - деп хабарлайды Dauletten.kz.
Жол учаскесінің ұзындығы 272 шақырымды құрайды. Жобаны жүзеге асыру 2018 жылы басталып, Еуропалық қайта құру және даму банкінің қарызы есебінен қаржыландырылды.
Реконструкция аяқталғаннан кейін жол үшінші техникалық санаттан екінші санатқа ауыстырылды. Енді тас жолда қозғалыстың әр бағытында ені 3,75 метр болатын бір-бір жолақтан қарастырылған. Жоба аясында алты көпір, бір жол өткелі салынды, 60 су өткізу құбыры мен он демалыс алаңы орнатылды. Сонымен қатар 650-ден астам жарықтандыру тіректері орнатылып, қозғалыстың жайлылығы мен қауіпсіздігі қамтамасыз етілді.
Реконструкция барысында халықаралық стандарттар қолданылды. Жобаны жүзеге асыруға Қазақстан, Италия, Түркия және Әзірбайжан компаниялары қатысты. 650-ден астам маман және 450-ге жуық арнайы техника жұмылдырылды. Жалпы көлемі 3,4 миллион тонна инертті материал пайдаланылып, олар теміржол арқылы Ақтөбе облысындағы (Мұғалжар) және Маңғыстау облысындағы (Шетпе) карьерлерден жеткізілді. Материалдарды тасымалдау үшін шамамен 50 мың жартылай вагон, ал битум жеткізуге 2,5 мың битумовоз жұмсалды. Бұрын осы жол учаскесінен өтуге бес сағаттай уақыт қажет болса, қазір бүкіл маршрутты екі сағатта еңсеруге болады. Бұл сапалы жол жамылғысы мен жоба аясында жасалған заманауи инфрақұрылымның арқасында мүмкін болды.
Атырау – Астрахан автомобиль жолын реконструкциялау жұмыстарының аяқталуы өңірдің көлік инфрақұрылымын дамытудағы маңызды кезең болып, Қазақстан мен Ресей арасындағы байланысты жақсартып, экономикалық өсім мен халықаралық сауданың дамуына ықпал етті.
