Жаңалықтар

“Ата жолы” картасы: Этникалық қазақтарға Қазақстанда тұру және жұмыс істеу мүмкіндігі берілді

24.02.2025

1 мин

0

148

Мемлекет басшысының тапсырмасымен 2023 жылдың шілде айынан бастап шетелде тұратын этникалық қазақтар үшін “Ата жолы” картасы енгізілді. Бұл бастама олардың Қазақстанға еркін кіріп-шығуын жеңілдетуге бағытталған. Жаңа мәртебе алған 65 этникалық қазақ “Ата жолы” картасының арқасында елде 10 жыл бойы тұруға және жұмыс істеуге мүмкіндік алды, - деп хабарлайды Dauletten.kz.

Еңбек және халықты әлеуметтік қорғау министрлігінің мәліметінше, осы 65 картаның 27-сі Қазақстанда кәсібін жүргізгісі келетін бизнес-иммигранттарға берілді, ал 38 карта сұранысқа ие мамандарға табысталды.

“Ата жолы” картасын иеленгендер арасында Ресей, Германия, Моңғолия, Қытай, АҚШ, Израиль, Франция, Ұлыбритания, Нидерланды, Финляндия, Қырғызстан, Өзбекстан елдерінен келген инженер-физиктер, инженер-математиктер, химик-технологтар, жақ-бет хирургтері, педиатрлар бар.

Бағдарламаның негізгі мақсаты – тарихи Отанмен байланысты нығайту, ұлттық дәстүрлерді сақтау, сондай-ақ кәсіби мамандар мен табысты кәсіпкерлерді Қазақстанға тарту. “Ата жолы” картасының иегерлері өз азаматтығын сақтап қалады.

“Ата жолы” картасы иелерінің құқықтары

Карта иелері Қазақстанға кірген кезде 10 жыл мерзімге тұру ықтиярхатын алады және өз бетінше кез келген өңірде жұмыс істеу немесе кәсіп жүргізу құқығына ие. Сондай-ақ олар Қазақстан азаматтарымен және қандастармен тең құқықтарды пайдаланады.

“Ата жолы” картасына” ие болғандар (және олардың отбасы мүшелері) мынандай құқықтарға ие:

• Мемлекеттік медициналық мекемелерде кепілдік берілген көлемде медициналық көмек алу;
• Қазақстанның Еңбек кодексі және “Халықтың көші-қоны туралы” заңы бойынша ел аумағында жұмысқа орналасу;
• Кәсіпкерлік кодексі мен өзге де құқықтық актілерге сәйкес кәсіпкерлік қызмет жүргізу;
• “Білім туралы” заң негізінде мемлекеттік мектептерде тегін орта білім алу, сондай-ақ конкурстық негізде тегін колледж немесе жоғары білім алу (жеке оқу орындарында ақылы негізде оқуға мүмкіндік бар);
• “Адвокаттық қызмет және заң көмегі туралы” заңға сәйкес мемлекет кепілдік берген заң көмегін пайдалану;
• Азаматтық туралы заңнама мен халықаралық келісімдерге сәйкес жеңілдетілген тәртіппен Қазақстан азаматтығын алу.

Шектеулер

Алайда “Ата жолы” картасының иелері:

• Қазақстан парламенті мен мәслихаттарына сайлауға және сайлануға құқығы жоқ;
• Республикалық референдумға қатыса алмайды;
• Мемлекеттік қызметке орналаса алмайды.

Егер карта иесі Қазақстан азаматтығын алса, “Ата жолы” картасы жарамсыз деп танылады.