|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Елордалық қоршаған ортаны қорғау және табиғатты пайдалану басқармасының басшысы Даулет Доскұлов мәслихат сессиясында қоқыс шығару тарифін көтеру туралы шешімді түсіндірді, - деп хабарлайды Dauletten.kz.
Даулет Доскұловтың айтуынша, қазіргі таңда Астанада қоқыс шығару тарифі бір адамға айына 390 теңгені құрайды.
- 2019 жылдан бері, яғни 5 жыл ішінде тариф өзгерген жоқ, ал Алматыда бұл көрсеткіш қазірдің өзінде 718 теңгеге жеткен. Уақытында шара қабылдамау күрделі салдарға әкеледі. 2024 жылдың жазында елордада қатты тұрмыстық қалдықтардың уақытында шығарылмауы әлеуметтік шиеленіске себеп болды. Бұған халық санының өсуі, тұрмыстық қалдықтардың көлемінің артуы, сондай-ақ оларды жинау және шығару шығындарының көбеюі себеп болды… 2019-2024 жылдар аралығында жұмысшылар мен жүргізушілердің орташа жалақысы 230%-ға өсті, жанар-жағармай бағасы 90%-ға қымбаттады, қоршаған ортаға эмиссия үшін жергілікті бюджетке төленетін салықтар 56%-ға артты, ал шығарылатын қоқыс көлемі 50%-ға көбейді. Мұның бәрі қоқыс шығару, қайта өңдеу және көму саласында жұмыс істейтін кәсіпорындардың шығындарын арттырды. Осылайша, 5 жыл ішінде негізгі шығын баптары бойынша нарықтық бағалардың орташа өсімі 107%-ды құрады, бұл екі есеге тең, – деді ол.
Сондай-ақ, халық санының 36%-ға өсуіне байланысты қоқыс шығаруға кететін шығындар 103%-ға артқанын атап өтті.
- 2019 жылы кәсіпорындардың нақты шығындары 260 миллион теңгені құраса, 2024 жылы бұл көрсеткіш 544 миллион теңгеге жетті. Бұл сандар көрсеткендей, қазіргі тариф жағдайында сала бизнес үшін тиімсіз. Астананың мәртебесін, сондай-ақ тұрмыстық қалдықтарды жинау және шығару қызметтерінің қауіпсіз әрі сапалы көрсетілу қажеттілігін ескере отырып, жаңа тарифті бекіту ұсынылады: абаттандырылған үйдің бір тұрғыны үшін – 637 теңге, абаттандырылмаған үйдің бір тұрғыны үшін – 679 теңге, – деді спикер.
Оның айтуынша, жаңа тарифті енгізу сұрыптау компанияларының тұрақты жұмыс істеуін қамтамасыз етіп, сұрыптау деңгейін 20%-ға дейін арттыруға, полигондардың жұмысын тұрақтандыруға, қоқыс таситын көліктердің апатты жағдайларын болдырмауға, салық түсімдерін қамтамасыз етуге, жою қорын толықтыруға, мемлекеттік бағдарламаларды ішінара қаржыландыруға, қызмет сапасын арттыруға және тегін әлеуметтік қызметтерді енгізуге мүмкіндік береді.
