|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Астана әкімдігі Есіл өзеніндегі атышулы “Күн” субұрқағының болашағы туралы пікір білдірді, - деп хабарлайды Dauletten.kz.
2023 жылы қала әкімі Жеңіс Қасымбек көп жылдан бері жұмыс істемей тұрған субұрқақты қалпына келтіру қомақты шығындарды талап ететінін, сондықтан оны бұзу жоспарланғанын айтқан болатын. Нысан былтыр жойылуы керек еді, алайда ол әлі де орнында тұр.
Астана Ішкі саясат басқармасының мәліметінше, субұрқақ құрылысына бөлінген бюджет қаражатын жымқыруға қатысты соталды тергеу жүргізілгендіктен, нысанды бұзу кейінге шегерілген. Тергеу аясында қажетті сараптамалар жүргізілген.
- Фонтан 2025 жылы жеке қаражат есебінен бұзылады. Бюджеттен қаражат қарастырылмаған, – деп хабарлады басқарма.
Әкімдік субұрқақты қалпына келтіру мен оны бұзу құны туралы сұрақтарға жауап бермеді. Сондай-ақ, металл конструкцияның бұзылғаннан кейінгі тағдыры да белгісіз күйде қалды.
Айта кетейік, “Күн” субұрқағы 2016 жылы Астана күніне орай ашылып, қала тұрғындарын ерекше құрылымымен таңғалдырған. Жалпы ауданы 3 600 шаршы метрді құрайтын субұрқақтың ұзындығы – 180 метр, ені – 20 метр, ал биіктігі 22 метрге дейін жеткен. Ол су ағындарын 80 метр биіктікке дейін көтере алатын қуатты су атқыштарымен жабдықталған.
Жоспар бойынша, субұрқақ жазғы кештерде лазерлік шоумен сүйемелденуі керек болса, күндіз сағат қызметін атқаруы тиіс болған. Алайда бұл көрініс ұзаққа созылмады. Қалалық мәдениет басқармасының мәліметінше, нысан 2019 жылдан бері жұмыс істемейді. Бұл жағдай “қыс мезгілінде электр кабельдері мен басқа да материалдардың ұрлануымен” байланыстырылады. Осы дерекке байланысты полиция қылмыстық іс қозғаған.
2024 жылдың қыркүйегінде Қаржылық мониторинг агенттігі мәдениет басқармасының бұрынғы басшысы Болат Мажағұловтың аса ірі көлемде қаржы жымқырды деген күдікпен ұсталғанын растады. Тергеу мәліметтері бойынша, фонтан құрылысына қатысты келісімшарттар мемлекеттік сатып алу рәсімдерін өткізбей жасалған.
Болат Мажағұлов өзіне тағылған айыптарды жоққа шығарды. Дегенмен сот оны кінәлі деп танып, 2025 жылғы 31 қаңтарда 8 жыл 6 айға бас бостандығынан айырды.
