|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Павлодар облыстық полиция департаментінің ұйымдасқан қылмысқа қарсы күрес басқармасы Алюминий зауыты аумағынан металл ұрлау схемасын анықтады, - деп хабарлайды Dauletten.kz Polisia.kz сайтына сілтеме жасап.
Қылмысқа кәсіпорын қызметкерлерінің қатысы бары анықталып, олардың заңсыз әрекеттері жедел шаралар барысында құжатталды.
Күдіктілер кезекті металл партиясын шығару кезінде қылмыс үстінде ұсталды. Олардың әрекеті салдарынан кәсіпорынға 30 миллион теңге көлемінде шығын келген. Қазіргі уақытта ұрлықтың бірнеше эпизоды бойынша қылмыстық іс тергелуде.
Сонымен қатар, Ұлытау облысында ұйымдасқан қылмысқа қарсы күрес басқармасы “Қазақмыс” корпорациясының қауіпсіздік қызметімен бірлесіп, осы кәсіпорын жұмысшыларынан құралған екі топты ұстады. Олар тауарлық-материалдық құндылықтарды ұрлау схемасын ұйымдастырған.
- Бірінші топтың құрамында учаске бастығы бар. Олар кәсіпорыннан 16 миллион теңгеден астам сомаға мүлік ұрлаған. Екінші топтың құрамында корпорация басқармаларының бірінің басшысы болған. Олар құжаттарды қолдан жасау арқылы ұрланған заттарды зауыт аумағынан шығарып отырған. Тергеу барысында күдіктілердің құқыққа қарсы әрекеттеріне қатысты дәлелдер жиналды, барлық күдіктілер ұсталды, – деп мәлімдеді ІІМ ұйымдасқан қылмысқа қарсы күрес департаментінің өкілі Қуандық Алпыс.
Қазіргі уақытта тергеу тобы алдын ала сөз байласу арқылы жасалған ұрлық фактілері бойынша сотқа дейінгі тергеу жүргізуде.
- Сонымен қатар, 2023 жылы ‘Qarmet’ АҚ-дан мүлік ұрлауды ұйымдастырған топтың бірнеше мүшесі ұзақ мерзімге сотталғанын атап өткен жөн. Осы кәсіпорында ұрлық жасаған тағы екі ұйымдасқан қылмыстық топқа қатысты тергеу аяқталып, қылмыстық істер сотқа жіберілді. Ірі өнеркәсіптік нысандарда ұйымдасқан қылмыстық топтардың әрекеттерін әшкерелеу және жолын кесу жұмыстары Ішкі істер министрлігінің ерекше бақылауында, – деді ведомство өкілі.
