Жаңалықтар

Маңғыстау облысында пойыз адамды қағып кетті

03.03.2025

1 мин

0

80

Сурет: cenzura.aktau

Маңғыстау облысында пойыз адамды қағып кетті, - деп хабарлайды Dauletten.kz.

- 2025 жылғы 28 ақпанда сағат 21:46-да Боранқұл станциясында пойыз бөгде адамды қағып кетті. Алдын ала мәлімет бойынша, ол белгіленбеген жерден теміржолды кесіп өтіп, қауіпсіздік ережелерін бұзған. Жарақат алған азамат Бейнеу станциясындағы аудандық ауруханаға жеткізілді. Оқиға туралы ақпарат Маңғыстау станциясының Желілік полиция бөліміне берілді, – деп хабарлады "Қазақстан темір жолы" (ҚТЖ) АҚ баспасөз қызметі.

Бейнеу аудандық орталық ауруханасының мәліметінше, оқиға орнына жеткен дәрігерлер зардап шеккен азаматты медициналық мекемеге жеткізді. 1989 жылы туған ер адам 2-дәрежелі травматикалық шок жағдайында және алкогольдік масаң күйде болған.

Дәрігерлер науқастың екі балтыр сүйегін кесуге мәжбүр болды.

Жалпы жағдайы ауыр, гемодинамикасы тұрақты. Санасы анық. Жүрек-қан тамыр жүйесі тұрақты. Жансақтау бөлімінен травматология бөліміне ауыстырылды.

- Теміржол құрамының қозғалысы басталған сәтте адамның қағылу фактісі бойынша "Теміржол көлігіндегі қозғалыс қауіпсіздігі немесе пайдалану ережелерін бұзу салдарынан абайсызда адамның денсаулығына ауыр немесе орташа ауырлықтағы зиян келтіру" бабымен қылмыстық іс қозғалды, – деп хабарлады Көлік полициясы департаментінің баспасөз қызметі.

ҚТЖ теміржол – жоғары қауіпті аймақ екенін еске салды.

- 2024 жылы ел бойынша пойыздың адамдарды қағып кетуінің 75 жағдайы тіркелді. Басты себептер – теміржолды рұқсат етілмеген жерден кесіп өту, алкогольдік масаңдық, құлаққап қолдану және өз-өзіне қол жұмсау оқиғалары. Жаяу жүргіншілер қауіпсіздік ережелерін қатаң сақтауы тиіс: теміржолды тек арнайы белгіленген орындардан кесіп өту, мұқият болу, құлаққап қолданбау және гаджеттерге алаңдамау, – деп атап өтті компания өкілдері.