|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Қазақстан мен Өзбекстан арасында қатынайтын “Jibek joly” туристік пойызы “Алматы – Түркістан – Ташкент – Самарқанд – Шымкент – Алматы” бағыты бойынша екінші сапарын сәтті аяқтады. Бұл сапарға 100-ден астам жолаушы қатысты. Бес күндік саяхат барысында олар Ұлы Жібек жолының ежелгі қалаларын аралап, аймақтың бай тарихымен танысты, - деп хабарлайды Dauletten.kz.
Екінші турдың ерекшелігі – маршрутқа жаңа қалалардың қосылуы, атап айтқанда Самарқанд пен Шымкент. Бұл оны алғашқы сапардан өзгеше әрі қызықты етеді.
Түркістанда жолаушылар Қожа Ахмет Ясауи мавзолейін, Арыстан баб кесенесін және “Әзірет Сұлтан” музей-қорығын аралады.
Ташкентте саяхатшылар Хазрати Имам тарихи кешенін, Барақхан медресесін, Әбу Бәкір Каффали Шаши мавзолейін және Төле би кесенесін тамашалады. Сонымен қатар, Ташкенттегі Magic City тақырыптық паркі қонақтар үшін демалыс пен ойын-сауықтың тамаша орны болды.
Самарқандта туристер Шахи-Зинда кешенін, Гур-Эмир мавзолейін және әйгілі Регистан алаңын аралады. Олар Шердор, Тіллә-Кари және Ұлықбек медреселерінің тарихымен танысып, Самарқандтың ерекше сәулеті мен мәдени мұрасынан ұмытылмас әсер алды.
Маршруттың соңғы аялдамасы – Шымкент қаласы болды, мұнда жолаушылар басты көрікті жерлер мен тарихи нысандарды тамашалады.
Саяхатшылардың ыңғайлылығы үшін тур бағдарламасына гид қызметтері, тамақтану, көрікті жерлерге кіру билеттері және трансфер енгізілді.
Халықаралық турды Қазақстан Республикасының Мәдениет және спорт министрлігі, “Жолаушылар тасымалы” АҚ, Республикалық “Қазақстан туризм индустриясы” қауымдастығы және “Kazakh Tourism” ҰК АҚ ұйымдастырды.
Жобаның негізгі мақсаты – Қазақстан мен Өзбекстан арасындағы туризмді дамыту, сондай-ақ халықтарды тарихи-мәдени мұрасымен танысу арқылы достық байланыстарды нығайту.
