|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Ақтау қаласының әкімдігі мемлекеттік сатып алу порталында әрқайсысы 4,6 миллион теңге тұратын қоқыс контейнерлерін сатып алуға арналған лот жариялады, - деп хабарлайды Dauletten.kz.
Lada.kz мәліметінше, "Ақтау қалалық ТКШ бөлімі" ММ тұрмыстық қатты қалдықтарды (ТҚҚ) жер астында жинауға және сақтауға арналған гидравликалық жүйені сатып алу және орнату туралы тендерді 28 ақпанда талқылауға шығарды. Конкурсқа алдын ала өтінімдер 5-13 наурыз аралығында қабылданады.
Жобаға жалпы 891 428 570 теңге бөлінуі жоспарланған (ҚҚС есептемегенде). Құжаттарға сәйкес, бір контейнердің құны – 4 642 857 теңге, ал жалпы 192 контейнер сатып алу көзделген.
Құжатқа сәйкес, контейнерлердің ішкі көлемі кемінде 1,1 текше метр (1100 литр) болуы тиіс. Өлшемдері 3560х1800х2700 мм. Корпусы – ыстықтай илектелген болаттан жасалған дәнекерленген құрылым, ал сақтау бактары тот баспайтын болаттан дайындалуы қажет.
Құжатта көрсетілгендей, 192 контейнерді орнату үшін қажетті материалдар сатып алынып, әр жүйеге 3 евроконтейнерден орналастырылады (жалпы саны – 576 дана).
Қалалық ТКШ бөлімінің хабарлауынша, контейнерлерді орналастыру орындары әлі нақтыланбаған.
– Контейнерлер халық көп жиналатын орындарға немесе көпқабатты тұрғын үйлердің жанына қойылуы мүмкін. Қазіргі таңда қоқыс уақытында шығарылмай, контейнерлер тез толып, қалдықтар шашылып жатады. Сондықтан санитарлық талаптарды сақтау және қаланың эстетикалық келбетін жақсарту мақсатында жаңа контейнерлерді тұрғын үйлердің маңына орнатуды жоспарлап отырмыз, – деп мәлімдеді бөлім өкілдері.
Құжатқа сәйкес, контейнерлердің кепілдік мерзімі – 36 ай.
