|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Ақтау қаласы маңында болған ұшақ апатына қатысты кеңес Мемлекет басшысы Қасым-Жомарт Тоқаевтың төрағалығымен өтті, - деп хабарлайды Dauletten.kz.
Президент апат салдарынан қаза тапқан Қазақстан азаматтарының жақындарына көңіл айтты.
Қасым-Жомарт Тоқаев құтқару қызметтерінің апатқа жедел әрі үйлесімді әрекет еткенін атап өтті.
– Апаттың зардаптары бұдан да ауыр болуы мүмкін еді, бірақ біз оған жол бермедік. Құтқару жұмыстары жоғары деңгейде ұйымдастырылды. Қажетті ақпарат уақытылы таратылды, ал азаматтарымыз зардап шеккендерге бірден көмек көрсетті. Халқымыз жанашырлық, ұйымшылдық және ынтымақтастық танытты. Қан тапсыру кезегіне тұрған халықтың белсенділігі мен Әзербайжан елшілігіне гүл шоқтарын қою сынды әрекеттері көпке үлгі болды. Бұл жағдайды шетелдік және отандық БАҚ кеңінен жариялады. Құтқарушылардың, дәрігерлердің, волонтерлердің еңбегін бүкіл әлем көрді. Әсіресе Әзербайжан, Ресей, Қырғызстан азаматтары ерекше алғыс білдіруде, – деді Президент.
Мемлекет басшысы Үкіметке апат салдарын жоюға атсалысқандардың еңбегін атап өтуді және ерекше көзге түскендерді мемлекеттік наградаға ұсынуды тапсырды. Сонымен бірге, шетелдік зардап шеккендерге медициналық және психологиялық көмек көрсетуді, қаза болған азаматтардың отбасыларына ерекше қолдау білдіруді міндеттеді.
Үкіметтік комиссия мен Бас прокуратураға ұшақ апатына байланысты жан-жақты және әділ тергеу жүргізу жүктелді. Президент бұл мәселе бойынша фейктер мен ақпараттық арандатушылыққа жол бермеу қажеттігін атап өтті. Сондай-ақ елдегі авиациялық қауіпсіздік жағдайын мұқият тексеру керектігін айтты.
Кеңес барысында Үкіметтік комиссия төрағасы Қанат Бозымбаев, Бас прокурор Берік Асылов, Ұлттық қауіпсіздік комитетінің төрағасы Ермек Сағымбаев, Ішкі істер министрі Ержан Сәденов және Денсаулық сақтау министрі Ақмарал Әлназарова баяндама жасады.
